सिरहा कारागारमा कोरोना संक्रमण भयावह, ५९९ कैदीबन्दीमध्ये ५०७ जना संक्रमित
<p>काठमाडौं। जिल्ला कारागार सिरहामा ५०७ जना कैदीबन्दीमा कोरोना संक्रमण पोजेटिभ देखिएको छ। संक्रमण देखिएकामध्ये ५०० जनाको उपचार भइरहेको छ। सात जना कोरोना संक्रमणमुक्त भएका छन्।</p>
<p>कारागारमा कूल ५९९ जना कैदीबन्दी छन्। कारागारमा यति ठूलो सङ्ख्यामा संक्रमित देखिएको यो पहिलो पटक हो। <br />
निमित्त कारागार प्रमुख बबिता महतोले निको भएका ७ जनासहित ७५ जनाको भने स्वाब परीक्षण गराउँदा कोरोना संक्रमणको रिपोर्ट नेगेटिभ आएको बताइन्। उनका अनुसार बाँकी २२ जनाको आउन बाँकी छ।</p>
<p>संक्रमतिको सङ्ख्या अधिक भएपछि आइसोलेट गरेर राख्न कारागारलाई समस्या भएको छ। हाल संक्रमितहरूलाई एकातिर र संक्रमण नदेखिएकाहरूलाई अर्कातिर राखिएको निमित्त कारागार प्रमुख महतोले बताइन्।</p>
<p>“कारागार साँघुरो छ, आइसोलेट गरेर राख्न समस्या भएको छ र अहिले हामीले संक्रमण पोजेटिभ देखिएका कैदीबन्दीहरूलाई एकातिर र अर्कोतिर नेगेटिभ देखिएकाहरूलाई राखेका छौं”, महतोले देखापढीसँग भनिन्, “स्वास्थ्य मन्त्रालयले जारी गरेको स्वास्थ्य मापदण्ड अनुसार राख्न सकिने अवस्था छैन।”</p>
<p>कारागारमै सिरहा नगरपालिका र जिल्ला स्वास्थ्य कार्यालयसँग समन्वय गरी चार जना अहेब, दुई जना अनमीसहितको स्वास्थ्यकर्मीको टोली खटाइएको छ। </p>
<p>जिल्ला अदालत सिरहाले विभिन्न मुद्दाका चार जनालाई अभियुक्तलाई पुर्पक्षाका लागि थुनामा राख्न आदेश दिएको र उनीहरूबाटै कोरोना संक्रमण फैलिएको कारागार प्रशासनले जनाएको छ।</p>
<p>“हामीले बाहिरदेखि आएकाको स्वाव परीक्षण गरेर कारागारभित्रकै क्वारेन्टिनमा राख्ने गथ्र्यौं, तर, अदालतले थुनामा राख्न आदेश दिएपछि आएका ती चार जनाको स्वाब परीक्षणको रिपोर्ट आएको थिएन र पछि उनीहरूको रिपोर्ट पोजेटिभ आयो”, निमित्त कारागार प्रमुख महतोले थपिन्, “कारागारमा उनीहरूबाटै संक्रमण फैलियो।”</p>
<p>थुनामा राख्न अदालतले पठाएका चार जनाको रिपोर्ट गएको साउन २६ गते आएको हो। त्यसपछि कारागार प्रशासनले ३० जनाको स्वाब संकलन गरेर परीक्षणको लागि प्रादेशीक प्रयोगशाला जनकपुर पठायो। </p>
<p>फेरि, थप तीन जनामा कोरोना संक्रमण पोजेटिभ भएको रिपोर्ट आयो। त्यसपछि बाँकी ८० जनाको स्वाब संकलन गरेर पठाउँदा ५९ जनाको संक्रमण भएको रिपोर्ट आएको महतोले बताइन्। </p>
<p>यसरी संक्रमण भुसमा आगो सल्किए जसरी सल्किएको थाहा पाएपछि बाँकी सबैको स्वाब संकलन गरेर परीक्षण गराउँदा ५९९ जनामध्ये ५०७ जनामा संक्रमण देखिएको महतोको भनाइ छ। </p>
<p>संक्रमितहरूलाई यस्तो बेला पौष्टिक आहारा प्रशस्त खुवाउनु पर्ने भएपनि पर्याप्तता नभएको महतोले बताइन्। तैपनि, खानाको अतिरिक्त झोलिलो खानेकुरा दाल, गेडागुडी, तानोपानी, आयुर्वेदीक औषधिहरू खुवाउँदै आएको बताएकी छिन्।</p>
प्रतिक्रिया दिनुहोस्
.jpg)
