अब पीसीआर परीक्षण शुल्क दुई हजार मात्र
<p>काठमाडौं। स्वास्थ्य तथा जनसंख्या मन्त्रालयले कोरोना भाइरस (कोभिड-१९)को पीसीआर परीक्षण शुल्क दुई हजार तोकेको छ।</p>
<p>मन्त्रालयले गरेको नियमित पत्रकार सम्मेलनमा मन्त्रालयका प्रवक्ता डा. जागेश्वर गौतमले अब सबै प्रयोगशालाले पीसीआर परीक्षणको अधिकतम शुल्क दुई हजार तोकिएको जानकारी दिए। </p>
<p>सरकारी तथा निजी अस्पताल वा प्रयोगशाला सबैले घटेको शुल्कमा पीसीआर परीक्षण गराउनुपर्ने हुन्छ। उनले राष्ट्रिय तथा अन्तर्राष्ट्रिय बजारमा पीसीआर परीक्षणको शुल्क पुनरावलोकन गरिएकाले नेपालमा पनि शुल्क घटेको बताए।</p>
<p>बजारमा रिएजेन्ट र पीसीआरका अन्य सामानको मूल्य घटेको आधारमा परीक्षण शुल्क पनि घटाइएको उनले जानकारी दिए। </p>
<p>यसअघि मन्त्रालयले पीसीआर परीक्षणका लागि चार हजार ४०० तोकेको थियो। त्यस भन्दाअघि पीसीआर परीक्षणका लागि मन्त्रालयले पाँच हजार ५०० रूपैयाँ शुल्क तोकेको थियो।</p>
<p>नेपालमा अहिलेसम्म आठ लाख ४० हजार ५२७ जनाको पीसीआर परीक्षण गरिएको छ। त्यसमध्ये ५४ हजार १५९ जना सङ्क्रमित भएका छन्। दैनिक करिब १० हजारको सङ्ख्यामा पीसीआर परीक्षण भइरहेको छ।</p>
<p>सरकारले सर्वसाधारण सबैलाई नि:शुल्क परीक्षण गर्दै आइरहेको छ भने सशुल्क परीक्षण गराउन इच्छुक व्यक्तिले मन्त्रालयले तोकेको अस्पताल वा प्रयोगशालामा गई परीक्षण गराउन सक्ने व्यवस्था गरेको छ। अहिले ४७ सरकारी प्रयोगशालामा पीसीआर परीक्षण हुँदै आइरहेको छ।</p>
<p>यसैगरी मन्त्रालयले बंगलादेशबाट आएको रेम्डेसिभिर खोप नेपाल स्वास्थ्य अनुसन्धान परिषद्को निर्देशिकाअनुसार प्रयोग गर्न सूचिकृत भएका अस्पतालमा बिरामीको चाप हेरेर वितरण गर्न निर्देशन दिएको उनले जानकारी दिए।</p>
<p>उक्त खोपको सम्पूर्ण वितरण परिषद्ले प्राप्त गरी मन्त्रालयमा पेश गर्नसमेत भनिएको छ। सरकारले बंगलादेशबाट पाँच हजार सो खोप प्राप्त गरेको उनले जानकारी दिए।</p>
प्रतिक्रिया दिनुहोस्
.jpg)
