'कोभिड-१९ को रोकथाम हाम्रै व्यवहारमा निर्भर छ'
<p>काठमाडाैं। नेपालमा केही दिन अगाडिसम्म लगातार उक्कालो लागिरहेको कोरोना भाइरसका नयाँ संक्रमितको ग्राफ पछिल्लो समय ओरालो लाग्न थालेको छ। </p>
<p>हिजो मात्र देशभर ९७९ जना संक्रमित थपिएका थिए। एक हजार ७३६ जना संक्रमण मुक्त भएर घर फर्किँदा ११ जनाको मृत्यु भएको थियो।</p>
<p>तर, आजको तथ्याङ्क हेर्दा गत २४ घण्टामा देशभर कोरोना भाइरसका ९०२ जना संक्रमित थपिएका छन्। त्यस्तै, दुई हजार २८७ जना संक्रमण मुक्त भएर घर फर्किएका छन् भने ६ जनाको मृत्यु भएको छ।</p>
<p>यसलाई कोरोना भाइरसविरुद्धको लडाईंमा हामी सुधारोन्मुख मार्गमा रहेको संकेतको रूपमा लिन सकिने स्वास्थ्य तथा जनसंख्या मन्त्रालयका प्रवक्ता प्राडा जागेश्वर गाैतम बताउँछन्।</p>
<p><strong>स्वास्थ्य मन्त्रालयको आजको प्रेस व्रिफिङमा प्राडा गाैतमले गरेको आग्रह उनकै शब्दमा:</strong></p>
<p><em>मलाई केही हुँदैन कोरोना भनेको बाहिरबाट आउनेलाई हुन्छ वा स्वास्थ्य समस्या भएका अथवा दिर्घ तथा अन्य रोग भएका बिरामीलाई हुन्छ। म बलियो छु। मलाई कुनै रोग छैन। र, भइहाले पनि मलाई केही खतरा छैन भन्ने खालका सोचहरु त्यागौं।</em></p>
<p><em>कोरोना भाइरसले धनी गरिब बुढो, तन्नेरी र केटाकेटी छुट्याउँदैन। बाहिरबाट सोचेजस्तो हाम्रो शरिर कोभिड-१९ को संक्रमणसँग जुध्न सक्ने नहुनसक्छ।</em></p>
<p><em>त्यसकारण हामी सबै कोरोना संक्रमणको जोखिममा छौं। त्यही भएर म बाहेक जसलाई पनि कोरोना भाइरस संक्रमण हुनसक्छ भन्ने शंका गरेर सचेत हुनुपर्दछ। </em></p>
<p><em>आफ्नो आफन्त, साथीभाई र चिनजानका मानिसमा कोरोना भाइरस छैन, उनीहरूसँग भेट्दा मास्क लगाउनु पर्दैन, दुई मिटर दूरी कायम गर्नु पर्दैन भन्ने सोचाइले ठूलो खतरा निम्त्याइरहेको हुन्छ।</em></p>
<p><em>त्यसैले सचेत रहौं, व्यवहार सुधारौं। </em></p>
<p><em>कोभिडको रोकथाम हाम्रो व्यवहारमा छ। यसको उपचार र खोप संसार मै अहिलेसम्म पत्ता लागेको छैन। कोरोनाविरुद्धको लडाईंमा अग्रपंक्तिमा खटिने स्वास्थ्यकर्मी, सुरक्षाकर्मी र स्यमंसेवकहरूले आफ्नो परिवारलाई घरमा छाडेर हाम्रो सेवामा अहोरात्र खटिनुभएको छ। यस क्रममा धेरै स्वास्थ्यकर्मी र सुरक्षाकर्मी सेवा दिने क्रममा नै संक्रमित हुनुपरेको छ।</em></p>
<p><em>यसरी हाम्रो सेवामा खटिने स्वास्थ्यकर्मी र सुरक्षाकर्मी नै संक्रमित हुँदै जानेहो भने भोलिका दिनमा हामीलाई सेवा दिनेको नै संकट वा कमी हुँदै जान्छ। </em></p>
<p><em>त्यसकारण कोरोना भाइरसविरुद्धको यस लडाईंमा हामी सबै आ-आफ्नो क्षेत्रबाट सक्रिय रूपमा जुटौं। त्यसकारण कोरोनाबाट बच्न स्वास्थ्य तथा जनसंख्या मन्त्रालयले जारी गरेको मापदण्ड मेरोलागि हो भन्ने बुझेर ब्यवहार गरौं।</em></p>
<p><em>एक अर्काबीच कम्तिमा दुई मिटरको दूरी कायम गरौं। अनिवार्य रूपमा नाक-मुख छोपिने गरी मास्कको प्रयोग गरौं।</em></p>
<p><em>बेला-बेलामा साबुनपानीले मिचिमिचि २० सकेन्डसम्म हातधुने गरौं। सकेसम्म आवश्यक नभई घरबाहिर नजाऔं। कोरोनाबाट आफू बाँचौं र अरूलाई पनि बचाऔं।</em></p>
प्रतिक्रिया दिनुहोस्
.jpg)
