एक सय ११ जना कैदीबन्दी कोरोना संक्रमित, ६२ जना उपचाररत
<p>काठमाडौं । कोरोना भाइरसबाट एक सय ११ जना कैदीबन्दी संक्रमित भइसकेका छन्। कारागार व्यवस्थापन विभागका अनुसार कारागार कार्यालय जगन्नाथ देवल सुन्धारामा संक्रमित सर्वाधिक देखिएको छ।</p>
<p>त्यहाँका ५१ जना कैदीबन्दीमा संक्रमण देखिएको हो। संक्रमण देखिएकामध्ये दुई जना निको भएका छन्। ४९ जना उपचाररत छन्।</p>
<p>वीरगञ्ज कारागारमा रहेका ३३ जनामा पनि कोरोना संक्रमण देखिएको छ। २९ जना निको हुँदा चार जना उपचारको क्रममा छन्।</p>
<p>बाँकेको नेपालगञ्ज कारागारमा संक्रमित ८ जना नै निको भएका छन्। सिराहा कारागारमा संक्रमित देखिएका सातमध्ये तीन जना निको भएको र चार जना उपचाररत छन्।</p>
<p>सुनसरीको झुम्का कारागारमा पनि संक्रमित देखिएका नौ जनामध्ये चार जना निको भएका छन्। सिन्धुपाल्चोक कारागारमा संक्रमित भएका दुबै जना निको भएका छन्।</p>
<p>कारागार व्यवस्थापन विभागका सूचना अधिकारी देवर्षि अधिकारीले हाल देशभर संक्रमण पुष्टि भएकामध्ये ४९ जना निको भएको बताए। ६२ जनाको उपचार भइरहेको छ।</p>
<p>कोरोनाको लक्षण देखिएका संक्रमितहरूको कोभिड–१९ अस्पतालहरूमा उपचार भइरहेको अधिकारीले बताए।<br />
“सशस्त्र प्रहरीको बलम्बुमा रहेको अस्पतालमा धेरै कैदीबन्दीको उपचार भइरहेको छ र कीर्तिपुरमा रहेको आयुर्वेद औषधालयमा पनि भइरहेको छ”, उनले देखापढीसँग भने, “कोभिड अस्पतालमा उपचार भइरहेकाहरू कोरोनाको लक्षण देखिएकाहरू हुन्।”</p>
<p>लक्षण नदेखिएका संक्रमितहरू भने सम्बन्धीत कारागारमै छन्। उनीहरूलाई आइसोलेसेन वार्ड स्थापना गरेर राखिएको विभागले जनाएको छ।</p>
<p>विभागका अनुसार संक्रमण देखिएकालाई ब्लक/ब्लकमा छुट्याएर राखिएको हो। संक्रमणको जोखिमका कारण ब्लक÷ब्लकमा अलग्याएर राख्नु परेको विभागले स्पष्ट पारेको छ।</p>
<p>यसैबीच, कारागारमा खटिएका सुरक्षाकर्मी, कर्मचारी र स्वास्थ्यकर्मीहरू गरी ८५ जनामा पनि कोरोना संक्रमण देखिएको छ।</p>
<p>उनीहरूमध्ये २४ जना संक्रमणमुक्त भएका छन्। ६१ जना उपचाररत छन्। कोभिड–१९ अस्पतालहरूमा संक्रमितहरूको उपचार भइरहेको हो।</p>
<p>हाल देशको ७१ जिल्लाको कारागार कार्यालयमा कैदीबन्दी छन्। क्षमताभन्दा चार गुणासम्म कैदीबन्दी छन्। </p>
<p>एकातिर कोरोना संक्रमणको महामारी फैलिएको बेला संरचना अभावमा कारागारहरूमा कैदीबन्दी कोचाकोच अवस्थामा छन्।<br />
जनस्वास्थ्यविद्हरूले कोरोना संक्रमण कारागारमा आगो जसरी सल्किन सक्ने भन्दै चिन्ता व्यक्त गरेका छन्। <br />
</p>
प्रतिक्रिया दिनुहोस्
.jpg)
