Health and Lifestyle

गृहपृष्ठ

समुदायमा कोरोना संक्रमणको अवस्था बुझ्न सेरोलजिकल परीक्षण गरिँदै काठमाडौं। देशभरी कोरोना संक्रमणको दर बढ्दै गएपछि इपिडिमियोलोजी तथा रोग नियन्त्रण महाशाखाले सेरोलजिकल टेस्टको तयारी गरेको छ ।  केही हप्तायता उपत्यका लगायत देशैभरि संक्रमण र मृत्युदर बढ्दै गएपछि महाशाखाले सेरोलजिकल टेस्टको तयारी गरेको हो। संक्रमणको जोखिम कुन तहसम्म पुगेको छ भनेर अध्ययन गर्न सेरोलजिकल टेस्टको तयारी गरिएको इपिडिमियोलोजी तथा रोग नियन्त्रण महाशाखाका निर्देशक डा बासुदेव पाण्डेले बताए। कहिलेबाट परीक्षण सुरु गर्ने भन्ने तय नभए पनि देशभरि नै हिमाल पहाड र तराईका जिल्ला समेटेर परीक्षण गरिने उनले बताए। सेरोलजिकल परीक्षणमा ‘कति केसहरु समुदायमा छन् र कस्तो अवस्थामा छ’ भन्ने कुरा पत्ता लाग्ने पनि डा पाण्डेले जानकारी दिए।  तथ्याङ्क विभागले जनसंख्याको सर्वेक्षण गर्न प्रयोग गर्ने विधिअनुसार नै नमूना संकलन गरिने उनले बताए। कालाजार, डेङ्गी र मलेरिया लगायतका महामारीको परीक्षणका लागि समेत प्रयोग हुने यो विधि कोरोना संक्रमणको जोखिम कति छ भनेर अध्ययन गर्न प्रयोग गर्न लागिएको हो।  ९० जनाको नमूना एउटै ठाउँमा राखेर परीक्षण गरिने र एक दिनमा परीक्षण हुने उनले जानकारी दिए। परीक्षणपछि कुनै व्यक्तिमा संक्रमण पहिले थियो वा थिएन र अहिले छ वा छैन भन्ने कुरा पत्ता लगाउन सक्ने डा पाण्डेले बताए। यो विधिबाट परीक्षणपछि समुदायमा कोरोना छ कि छैन ? कहिले देखि नेपालमा आएको होला ?  कहिलेसम्म रहन्छ ?  भन्ने प्रश्नहरुको जवाफ दिन सहज हुने उनले बताए। पहिलो पटकका परीक्षणमा प्रारम्भिक सूचनाहरु संकलन गर्न सहज भए पनि लगातार तीन वर्षसम्म निरन्तर परीक्षण गरिने पनि उनले जानकारी दिए।

प्रतिक्रिया दिनुहोस्