डोटीमा पीसीआर सञ्चालन
<p> काठमाडाैं। डोटी जिल्ला अस्पतालमा कोभिड-१९ परीक्षण गर्न पिसिआर प्रयोगशाला सञ्चालनमा ल्याइएको छ। यसले अछाम, बाजुरा तथा डोटीका नागरिकको स्वाब परीक्षणमा सहज बनाएको छ।</p>
<p>सुदूरपश्चिम प्रदेश सामाजिक विकास मन्त्रालयको सहयोगमा कूल रु एक करोड ५० लाखको लागतमा प्रयोगशाला सञ्चालनमा ल्याइएकोे सुदूरपश्चिम प्रदेश स्वास्थ्य निर्देशक डा गुणराज अवस्थीले जानकारी दिए।</p>
<p>प्रयोगशालाले एक पटकमा कम्तीमा ३०० को स्वाब परीक्षण गर्ने लक्ष्यअनुसार काम भइरहेको बायोमेडिकल इञ्जिनीयर जय साउँदले बताए।</p>
<p>सुदूरपश्चिम प्रदेशका मुख्यमन्त्री त्रिलोचन भट्टले आज यहाँ प्रयोगशालाको शुभारम्भ गर्दै कोभिड-१९ को रोकथाम तथा नियन्त्रण गर्न प्रदेश सरकारले अग्रगामी भूमिका निर्वाह गरेको बताए।</p>
<p>उनले भने, “कोरोना नियन्त्रण तथा रोकथाममा अन्य प्रदेशभन्दा सुदूरपश्चिम प्रदेश सबैभन्दा अगाडि छ, सरकारको उल्लेख्य भूमिकाले समुदायमा कोरोना फैलिन दिएका छैनौँ।”</p>
<p>मुख्यमन्त्री भट्टले सुदूरपश्चिमका नागरिकको स्वास्थ्य क्षेत्रमा सहज पहुँच बनाउनका लागि प्रदेश सरकारले विभिन्न नीति तथा कार्यक्रम कार्यान्वयन गरिराखेको जानकारी दिए।</p>
<p>उनका अनुसार प्रदेश सरकारले यहाँका नौवटै जिल्लामा हरेका जिल्ला अस्पतालमा दुई-दुई वटा भेन्टिलेटर निकट भविष्यमै निर्माण गर्ने योजनाअनुसार काम अगाडि बढेको छ।</p>
<p>“गम्भीर प्रकृतिबाहेक अन्य रोगका बिरामीलाई प्रदेश बाहिर उपचारका लागि धाउनुपर्ने अवस्थाको अन्त्य हुन्छ, प्रदेशमै स्वास्थ्य उपचार गर्ने व्यवस्था मिलाउँदै छौँ,”उनले भने। </p>
<p>सुदूरपश्चिममा कोरोना सङ्क्रमितको सङ्ख्या बढ्नुमा सङ्घीय सरकार दोषी रहेको मुख्यमन्त्री भट्टले आरोप लगाए।</p>
<p>“प्रदेश सरकारले भनेको कुरो सङ्घीय सरकारले नमान्दा सुदूरपश्चिममा कोरोना सङ्क्रमितको सङ्ख्या बढेको हो”, उनले भने, “सुदूरपश्चिममा कोरोना सङ्क्रमित थपिनुमा सङ्घीय सरकार दोषी छ।”</p>
<p>रासस</p>
प्रतिक्रिया दिनुहोस्
.jpg)
