त्रिवि शिक्षण अस्पतालका थप ८ स्वास्थ्यकर्मीमा कोरोना संक्रमण, दुई डाक्टर आईसीयूमा
<p>काठमाडौं। महाराजगञ्जस्थित त्रिवि शिक्षण अस्पतालका थप आठजना स्वास्थ्यकर्मीलाई कोरोना संक्रमण देखिएको छ।</p>
<p>डाक्टर, नर्स तथा कर्मचारी गरी आठजनाको कोरोना परीक्षण रिपोर्ट पोजिटिभ आएको हो।</p>
<p>यसअघि २८ साउनमा ६ जनाको रिपोर्ट पोजिटिभ आएको थियो।</p>
<p>अहिलेसम्म अस्पतालका २६ स्वास्थ्यकर्मीमा कोरोना संक्रमण देखिएको अस्पतालका कोभिड–१९ फोकल पर्सन डा. सन्तकुमार दासले जानकारी दिए। उनीहरूमध्ये १४ जना सक्रिय संक्रमित हुन्।</p>
<p>इमर्जेन्सी वार्डका करिब १०० जनाको स्वाब संकलन गरेर परीक्षणका लागि पठाइएको छ।</p>
<p>उनीहरूको रिपोर्ट आउने क्रम जारी रहेको भन्दै रिपोर्ट नआइसक्दासम्म इमर्जेन्सी वार्ड बन्द रहने डा. दासको भनाइ छ।</p>
<p>रिपोर्ट आउन बाँकी रहेकाहरूलाई होम क्वारेन्टिनमा राखिएको छ।</p>
<p>संक्रमितलाई आइसोलेनमा राखिएको छ। इमर्जेन्सी वार्ड बन्द गरिए पनि अन्य सेवाहरू भने जारी रहेको डा. दासले जानकारी दिए।</p>
<p><strong>दुई चिकित्सक आईसीयूमा</strong></p>
<p>अस्पतालमा दुईजना कोरोना संक्रमित चिकित्सकको आईसीयूमा राखेर उपचार भइरहेको छ।</p>
<p>डा. दासका अनुसार एकजना वीर अस्पताल र एकजना विराटनगरको नोबेल हस्पिटलका हुन्।</p>
<p>स्वास्थ्य अवस्था गम्भीर देखिएपछि एकजनालाई गत शनिबार र अर्कालाई मंगलबार अस्पताल भर्ना गरिएको थियो।</p>
<p>दुवैजनाको स्वास्थ्य अवस्था स्थिर रहेको डा. दासले बताए।</p>
प्रतिक्रिया दिनुहोस्
.jpg)
