कोरोनाका सक्रिय केस सबैभन्दा बढी सुदूरपश्चिममा
<p>काठमाडौं। नेपालमा कोरोना भाइरसका सक्रिय केस सबैभन्दा बढी सुदूरपश्चिम प्रदेशमा रहेका छन्। </p>
<p>स्वास्थ्य तथा जनसंख्या मन्त्रालयको पछिल्लो तथ्यांकअनुसार सुदूरपश्चिममा आज (मंगलबार)सम्म एक हजार ९९२ जनामा कोरोना भाइरसका सक्रिय केस रहेका छन्।</p>
<p>यो संख्या मुलुकका सातवटै प्रदेशमध्येको सबैभन्दा बढी हो।</p>
<p>मन्त्रालयका अनुसार नेपालभर आजसम्म पाँच हजार ४७७ कोरोनाका सक्रिय केस रहेका छन्।</p>
<p>सुदूरपश्चिमपछि प्रदेश २ मा दोस्रो बढी सक्रिय केस रहेका छन्। उक्त प्रदेशमा हाल एक हजार ९१३ सक्रिय केस रहेको स्वास्थ्य मन्त्रालयले जनाएको छ। </p>
<p>सबैभन्दा कम सक्रिय केस प्रदेश १ मा रहेको छ। उक्त प्रदेशमा हाल जम्मा १०८ सक्रिय केस छन्। </p>
<p>यसैगरी, बागमती प्रदेशमा ४२१, गण्डकी प्रदेशमा ३८०, प्रदेश ५ मा ३७० र कर्णाली प्रदेशमा २९३ जनामा कोरोना भाइरसका सक्रिय केस रहेको स्वास्थ्य मन्त्रालयको तथ्यांक छ। </p>
<p>नेपालमा मंगलबारसम्म कूल संक्रमितको संख्या १७ हजार ९९४ पुगेको छ। उक्त संक्रमितमध्ये ६९.३ प्रतिशत अर्थात् १२ हजार ४७७ जना उपचारपछि निको भइसकेका छन्। </p>
<p>उपचारपछि निको हुनेमा प्रदेश १ का ७५० जना, प्रदेश २ का दुई हजार ७६६ जना, बागमती प्रदेशका ४५२ जना, गण्डकी प्रदेशका एक हजार २० जना, प्रदेश ५ का तीन हजार ८१८ जना, कर्णाली प्रदेशका एक हजार ५४० जना र सुदूरपश्चिम प्रदेशका दुई हजार १२९ जना रहेका छन्।</p>
<p>कोरोना संक्रमणका कारण नेपालमा ४० जनाले ज्यान गुमाइसकेका छन्।</p>
<p>मृत्यु भएकामध्ये प्रदेश ५ का १० जना, बागमती प्रदेशका ९ जना, सुदूरपश्चिम प्रदेश र प्रदेश २ का ६-६ जना तथा गण्डकी प्रदेशका चारजना छन्।</p>
<p>प्रदेश १ मा भने हालसम्म कसैले पनि कोरोना संक्रमणबाट ज्यान गुमाउनु परेकाे छैन।</p>
<p>नेपालमा गत वर्ष माघ ९ गते पहिलोपटक कोरोना भाइरसको संक्रमण देखिएको थियो। </p>
<p>कोरोना भाइरसको संक्रमण रोकथाम तथा नियन्त्रणका लागि सरकारले गत चैत ११ गतेबाट देशभर लकडाउन लागू गरेको थियो।</p>
<p>त्यसयता पटकपटक लकडाउनको अवधि थप गर्दै आएकोमा हिजो (सोमबार) बसेको मन्त्रिपरिषद् बैठकले आज रातिबाट लकडाउन अन्त्य गर्ने निर्णय गरेको छ।</p>
प्रतिक्रिया दिनुहोस्
.jpg)
