विश्वकप र एएफसी एशियन कपका छनोट खेल अक्टोबर र नोभेम्बरमा गराउन एएफसीको प्रस्ताव
<p>काठमाडौं। एशियाली फुटबल महासंघ (एएफसी) ले कोभिड-१९ का कारण स्थगित फिफा विश्‍वकप २०२२ तथा एएफसी एशियन कप २०२३ का छनोट खेलहरू चार महीनापछि गराउने प्रस्ताव अघि बढाएको छ।</p>
<p>नेपालले खेल्ने ती खेल आगामी अक्टोबर र नोभेम्बरमा गराउन एएफसीले विश्‍व फुटबल महासंघ (फिफा)लाई प्रस्ताव गरेको हो। </p>
<p>यसअघि गत चैतमा अस्ट्रेलिया, चाइनिज ताइपेइ र जोर्डनसँग छनोट खेल घरेलु मैदानमा खेल्ने तय भए पनि कोरोना भाइरसका कारण स्थगित भएको थियोे। स्थगित खेल अक्टोबर ८ र १३ तथा नोभेम्बर १२ र १७ मा गर्न प्रस्ताव गरिएको एएफसीले जनाएको छ।</p>
<p>विभिन्न देशका फुटबल संघसितको भिडियो बैठकपछि एएफसीले उक्त मितिमा खेल गराउन तयारी थालेको हो। दोस्रो चरणको छनोटअन्तर्गत नेपालले तीन खेल खेल्न बाँकी छ। ती सबै खेल नेपालले घरेलु मैदानमा खेल्नेछ।</p>
<p>एएफसीको प्रस्तावलाई फिफाले अनुमति दिएमा नेपालले ८ अक्टोबरमा चाइनिज ताइपेइ, १३ अक्टोबरमा अस्ट्रेलिया र १२ नोभेम्बरमा जोर्डनसँग खेल्नेछ।</p>
<p>‘समूह बी’मा रहेको नेपालले हालसम्म पाँच खेलमा तीन अंक जोडेको छ। नेपालले चाइनिज ताइपेइलाई पराजित गरी उक्त समूहमा चौथो स्थान बनाएको थियो।</p>
<p>हालसम्मको खेल प्रदर्शनअनुसार १२ अंकका साथ अस्ट्रेलिया शीर्षस्थानमा, १० अंकका साथ कुवेत दोस्रो, समान १० अंक नै बनाएको जोर्डन तेस्रो तथा अंकविहीन अवस्थामा रहेको चाइनिज ताइपेइ ‘समूह बी’को पुछारमा छ।</p>
<p>समूहको शीर्षटोली विश्‍वकपको तेस्रो चरणमा पुग्नुका साथै एशिया कपमा सोझै पुग्नेछ। दोस्रो हुने टोली विश्‍वकपको तेस्रो चरणमा तथा एशिया कप छनोटको तेस्रो चरणमा पुग्नेछ।</p>
<p>तेस्रो, चौथो र पाँचौँ स्थानमा रहने टोली विश्‍वकप छनोटबाट बाहिरिने छन्। विश्‍वकप २०२२ कतारमा तथा एएफसी एशियन कप २०२३ चीनमा हुनेछ। <em><strong>रासस</strong></em></p>
प्रतिक्रिया दिनुहोस्
.jpg)
