आमाको सम्झनामा ऋचा शर्मा लेख्छिन् : म एक वर्षदेखि भोकी छु
<p>काठमाडौं। नायिका ऋचा शर्माको आमाको निधन भएको एक वर्ष पुगेको छ। आमा रिनादेवीको गत वर्ष आजकै दिन ६७ वर्षको उमेरमा निधन भएको थियो। </p>
<p>आमाको निधनबाट आफू अझै पनि विक्षिप्त बनिरहेको ऋचाको भनाई छ। वार्षिक पुण्यतिथिमा सामाजिक सञ्जाल फेसबुक र ट्विटरमा उनले आमा बित्दा आफ्नो सानो संसार एकाएक भताभुंग भएको बताइन्।</p>
<p>आमाको निधनले आफ्नो मुटुको एउटा कुना नै भत्किएको भन्दै उनले लेखेकी छिन्, “मलाई राम्ररी थाहा छ- त्यो कुनो म बाँचुन्जेल कहिल्यै भरिनेछैन् अब।” </p>
<p>आमाको निधनपछि आफूले जीवनको ओत गुमाएको भन्दै उनले लेखेकी छिन्, “आमा भनेका घर हुन्। त्यो घर, जसले हामीलाई एकपटक जन्म र जीवनभर ओत दिन्छ। जीवन दिनेहरू इश्वर हुन्। मेरी इश्वर मबाट टाढा गएको आज एक वर्ष भयो। उहाँ गएपछि मेरो जीवनले ओत गुमायो। अर्थ गुमायो। मैले मेरो शीरमाथिको ब्रह्माण्ड गुमाएँ।”</p>
<p>आमा विनाका ३६५ दिन आफ्नो लागि रित्तो पानामा रुपान्तरित भएको उनले बताइन्। “उहाँविनाका यी ३६५ दिन मेरो जीवनको एउटा रित्तो पाना हो, जसमा अक्षर र वाक्य त छन्। तर अर्थ र आत्मा छैन्। आमा! सन्तानहरू मायाका भोका हुन्छन्। म एक वर्षदेखि भोको छु। र, यो भोक जीवनभर मेटिनेछैन्,” उनले लेखेकी छिन्। </p>
<p>ऋचाले विवाह गरेको एक महिनामै आमा गुमाएकी थिइन्। <br />
</p>
प्रतिक्रिया दिनुहोस्
.jpg)
