दीपकराज गिरीको डर: ‘क्यामेरा बन्दुक जस्तो, माइक ट्रिगर जस्तो’
<p>काठमाडौं। कलाकार दीपकराज गिरीले अन्तर्वार्ताका लागि डराउनुपर्ने बेला आएको बताएका छन्। हरेक दिन कुन कलाकार भाइरल हुने हो भन्ने डरले मुटु झस्किरहने बताए।</p>
<p>सामाजिक सञ्जाल फेसबुकमा हिजो र आज भन्दै लेखिएको स्टाटसमा एकातिर कोरोना भाइरसको डर भने अर्कोतिर भाइरलको डर भएको बताएका हुन्।</p>
<p>हिजोका दिनमा कुनै च्यानलमा अन्तर्वार्ता दिएर आउँदा निकै खुशी लाग्ने तर, आजकल अन्तर्वार्ता दिनै डर लाग्ने गरेको बताए।</p>
<p>आजकल अन्तर्वार्ताका लागि फोन आउँदा पनि अपराध अनुसन्धान कार्यालयबाट फोन आएको जस्तो हुने गरेको लेखेका छन्, “त्यसैले सकेसम्म फोनै उठाइन्न र उठाइहाले पनि बिजी छु पछि गरौला नि है? भनेर टारिन्छ। सबैलाई त टार्न सकिन्न। अनि अन्तर्वाता दिन त जानै पर्‍यो। जानै परेपछि सबैभन्दा पहिदा सामान्य ज्ञान पल्टाएर राष्ट्रिय गानका रचियता को हुन्? नेपालको सबैभन्दा सानो जिल्ला कुन हो? लगायतका कुरा दिमागमा राख्नुपर्छ।”</p>
<p>अन्तर्वार्ता दिन जाँदा सबैभन्दा पहिला आँखा क्यामेरातिर पर्ने तर, त्यो क्यामेरा नभएर बन्दुक जस्तो लाग्ने गरेको बताए।</p>
<p>उनले लेखेका छन्, “आफूलाई त्यो क्यामेरा होइन्, बन्दुक जस्तो लाग्छ। मानौं रिर्पोटिङ गर्नेको हातमा पनि माइक होइन ट्रिगरमा छ।”</p>
<p>आफूले पत्रकार र कलाकारबीच बढ्न सक्ने दूरीको विषयलाई उठान गरेको भन्दै यो आजको भन्दा भोलिको बास्तविकता हुने बताए।</p>
<p>कलाकारलाई भाइरल गराउने मनसायका साथ अगाडि बढेका पत्रकारका कारण सहि तरिकाले पत्रकारिता गर्दै आएका पत्रकारलाई समस्या पर्ने बताए।</p>
<p>केही समय अगाडि अन्तर्वार्ताका कारण दीपाश्री निरौला, पूजा शर्मा लगायतका कलाकारहरू विवादमा तानिएका थिए। त्यसपछि कलाकर्मीहरू पत्रकारसँग सजक हुनुपर्ने आवाज उठाउँदै आएका छन्।</p>
प्रतिक्रिया दिनुहोस्
.jpg)
