‘सक्किगोनि’ को टीमविरुद्ध मिडिया हबकाे उजुरी
<p>काठमाडाैं। हास्य टेलिश्रृंखला ‘सक्किगोनि’ को टीमविरुद्ध मिडिया हबले ३ कात्तिकमा महानगरीय प्रहरी परिसर टेकुमा 'कपिराइट' (प्रतिलिपि अधिकार)को उजुरी हालेको छ।</p>
<p>हबका प्रमुख सोम धितालले 'सक्किगोनि' का कुमार कट्टेल 'जिग्री', अर्जुन घिमिरे 'पाँडे'लगायतका केही कलाकारले आफ्नो 'कपिराइट' भएको 'भद्रगोल" सिरियलको पात्रको प्रयोग अनुमतिबिना गरेको आरोप लगाउँदै उजुरी दिएका हुन्।</p>
<p>यसबारे कुमार कट्टेल 'जिग्री' र अर्जुन घिमिरे 'पाँडे'ले आफ्नो सामाजिक सञ्जालमा `यही देश मा बसेर कलाकारिता गर्नु र कलाकार बन्नु नै मेरो गल्ती हो भने, उजुरी मात्र किन हात मा हत्कडी नै लगाएर थुनिदिनुस !!´ भनेर लेखेका छन्। उनीहरूको स्ट्याटसमा दर्शकले चिन्ता नलिन अनुरोध गरेका छन्।</p>
<p>टेकुका प्रहरी नायव उपरीक्षक होबिन्द्र बोगटीले मिडिया हबले कपिराइटको उजुरी दिएको र त्यसको बारेमा अनुसन्धान शुरु गरेको जानकारी दिए।</p>
<p>उनका अनुसार थप छलफलका लागि भने दुवै पक्षलाई ८ कात्तिकमा बोलाइएको छ ।</p>
<p>केही समय अघि मिडिया हबले 'भद्रगोल' टेलिश्रृंखला निर्माण गरेको पारिश्रमिक नदिएको भन्दै कट्टेल र घिमिरेसहितकाे टाेली त्यहाँबाट छुट्टिएकाे थियाे। लगत्तै उनीहरूले 'सक्किगोनि' टेलिश्रृंखला निर्माण गरे।</p>
<p>अहिले पनि भद्रगोल प्रशारण भइरहेको छ। पुराना कलाकार नभएपछि भद्रगाेलले दर्शककाे माया पाउन छाडेकाे छ। पहिले जस्तो लोकप्रिय छैन।</p>
<p>तर, शुरु भएको केही समयमै सक्किगोनिले भने लोकप्रियता हासिल गर्दै गइरहेको छ।</p>
प्रतिक्रिया दिनुहोस्
.jpg)
